وعدنا وكنا قد الوعد مع موجه كافى فى رمضان مش هتقدر تغمض عنيك وهنوريك اللى عمرك ما شفته
و دة زى ما قلنا بوستر الحلقات
نرجع بقى لروميو وجوليت
المشهد الثانى والاخير(( أمام منزل جوليت كان روميو يقطف الزهور منن حديقة بيتها ويقذفها إلى النافذه جوليت ، وبعد طول أنتظار أطلت جوليت
من النافذه ))
جوليت : نعم يا روميو
روميو : أيه يا حياتى بقالى ساعه مستنيكى ع القهوه.. أنتِ مش ناويه تيجى أخلص تارى منك فى الشطرنج؟
جوليت : أنا مش هقدر أقابلك تانى يا روميو
روميو : ليه بس يا جولى ؟ ايه اللى حصل يا حياتى؟
جوليت ( تبكى )
روميو : فى ايه بس يا جولى؟ بليز متبكيش انا قلبى رهيف ومش هستحمل اشوفك بتبكى..أهئ أهئ
جوليت : بابا...
روميو : مات؟! لاحول ولا قوه إلا بالله...كان راجل طيب..أهئ أهئ
جوليت : إن شاء أنت وأبوك وعيلتك كلها
روميو : ليه بس الغلط يا حياتى؟ يعنى اونكل لسه عايش؟
جوليت : أه...أمتى ربنا يخده ويريحنى منه؟ أمتى بس؟ أمتـــــــــى؟
تصور الراجل الدون عايز يجوزنى
روميو : يجوزك ده ايه؟ طب وانا...؟
جوليت : أنت تشرب من البحر
روميو : طيب هو من أنهى ناحيه؟
جوليت : ايه هو ؟
روميو : البحر....يمين ولا شمال يا جولى يا حبيبتى؟
جوليت ( مغتاظه ) : طيب غور...إن شاء الله تغرق وتموت.
روميو : ليه بس كده يا روحى..يعنى انا هعمل ايه ؟
جوليت : أخطفنى.
روميو : طيب استنى اجيب لك سلم واطلع لك عشان اخطفك أصل بصراحه انا مش هعرف اطلع ع الشجره دى
جوليت : بقولك ايه ؟ انا عندى حل احسن من ده كله...تعالى اطلب ايدى من بابا.
روميو : ايدك ايه بس ياروحى...خلينا نشوف حل فى المشكله
دى...أجيب سلم منين بس ؟
جوليت : حاول تطلع ع الشجره
روميو : مش هقدر وبعدين انا معيش ورد كده احنا هنبوظ القصه خالص.
جوليت : قصه ايه بس ؟
روميو : قصه حبنا يا جميل...يا قمر...يا....
جوليت : ياروميو...متكسفنيش بقى.
روميو : ايه ده يا جولى يا حياتى...هو انتى بتتكسفى زينا كده.
جوليت : ربنا يحرقك...ألهى تولع يا روميو.
روميو : انا اسف يا روحى.
جوليت : خلاص يا روميو مسمحاك
روميو : نرجع للمشكله اللى ملهاش حل
جوليت : انا لقيت حل...ايه رأيك أفك حبل الغسيل
روميو : والله فكره فكيه قبل ما تهربى عشان تنتقمى من أونكل لما يجى يغسل مش هيلاقى حبل ينشر عليه الهدوم..ههههههههههه
جوليت : ايه العبط ده يا روميو...انا بقولك افك الحبل عشان تطلع عليه وتخطفنى
روميو : اها...فكره ذكيه.. يا أفكارك يا جولى..بس بقولك ايه ياروحى.. وفرى على نفسك ومتفكيش الحبل لأنى مش هعرف أطلع عليه
جوليت : امال انت بتعرف تعمل ايه بس؟
روميو : بعرف اطلع ع السلم
جوليت : لا حبل ولا سلم ثوانى انا هنزل لك اصل بابا مش هنا.
روميو : بجد....طيب يلا أنزلى
جوليت ( أغلقت النافذه )
روميو : يلا بسرعه عشان نهرب.. آل أيه أونكل عايز يجوزها.. شوفوا الراجل اللى معندوش دم ولا أحساس.. دانا بقالى 10 سنين ماشى معاها وفى الأخر عايز يطلعنى من المولد بلا حمص.. راجل معندوش أخلاق صحيح.
( فى هذه اللحظه قبضت يد على كتف روميو من الخلف ، فألتفت خلفه ليقع بصره على والد جوليت الذى ضاقت عيناه
من شدة غضبه )
روميو : جيت فى وقتك يا اونكل داحنا لسه كنا حنهرب.. تعالى أهرب معانا بقى.. ولا أقولك روح ربى بنتك دى.. كان هتبوظ أخلاقى يا أونكل وتخلينى أهرب معاها.. بس الحمد لله أنك وصلت فى اللحظه الحاسمه.
( أخرج روميو من جيب سُترته نصل حاد وأعطاه إلى والد جوليت )
روميو: يلا يا أونكل.. روح أغسل عارك بأيدك.
( أمسك والد جوليت بالنصل وغرسه فى قلب روميو فسقط هذا الأخير على الأرض جثه هامده.. وبهذا أنتهت قصه حب روميو وجوليت بمقتل روميو على يد والد جوليت. )
خلاص خلاص خلصت خلاص استنونا بقى وشخصيات جديده
وبرده مش هتقدر تغمض عنيك
